Jaien hasiera estraofiziala

Asteburuak, aurtengo ‘Santixau’ jaiak estraofizialki hastea ahalbidetuko du. Gaur gauean koadrilen arteko jokoei amaiera emango zaie, lehiaketen artean klasikoa bihurtu zaigun ‘Playback’eko saioarekin. Hitzordua luzatuta dago, Orbe Kardinalaren plazako oholtzan , gaueko hamar eta erdietarako. Hogei txarangek eman dute izena gaurko lehiaketan parte hartzeko, seguruenik, beste behin arrakastatsua suertatuko dena eta jende ugari bilduko duena. Gauza ziurra da, plazan zer entzun eta zer ikusi egongo dela.

Bihar, ‘Barricada’ren kontzertua

Larunbatean aurtengo egitarauaren barne entzute handia lortu duen ikuskizuna gauzatuko da. ‘Barricada’ taldearen dohaineko kontzertua. Talde rockeroak bi orduko emanaldia eskainiko du, “Hombre mate hombre” bere azken diskoaren eta aurreko diskoetako kantuekin. Hori guztia, gaueko hamaika eta erdietatik aurrera izango da, Orbe Kardinalaren plazan.

Igandean ‘txupinazoa’ botako da

Igande arratsaldez jaiak ofizialki zabalduko dira, ohikoa den txapligua bota eta gero. ‘Txupinazoa’ arratsaldeko zazpietan botako da plazan, jarraian txarangak aurkezteko desfile eta kalejirari hasiera emanez. Txarangak aurkezteko ekitaldiak ‘Irulitxa’ fanfarrearen musikarekin girotuko da. Ondoren, etengabeko hiru jai egunei hasiera emango zaie.