Zine dokumentalaren zikloa gaur amaituko da

Gaur gauean amaiera emango zaio zine dokumentalaren zikloari, maiatzeko zine-klubean. Gaur Benjamín Ávila zuzendariaren ‘Nietos’ (bilobak, nortasuna eta memoria) filma ikusi ahal izango da. Emanaldia gaueko hamarrak eta laurdenetan hasiko da, Zineman. Ekimena Mudo-Drogot elkarteak antolatu du. Sarrerak 2,60 euro balio du.

Sinopsia

1976tik 1983ra Argentinan diktadura militar bortitza izan zen. Urte horietan milaka pertsona bahitu eta erail izan zituzten, inolako zigorrik jasan gabe. Askotan, ‘desagerrarazten’ zituzten pertsonen seme-alabak eta bahiturik eramaten zituzten emakume haurdunen jaio berriak kendu eta ilegalki banatzen zituzten. Epe ilun horrek ondore modura, egoera hori bizi izan zuten bostehun bat ume utzi ditu.

‘Nietos’ filma hunkigarria da, egun nortasuna faltsututa duten gazteei ondorengo mezua igorri nahi diena: nortasunaren eta memoriaren buru-hausgarri hori berreraikitzeak duen garrantzia, jasandako samina irauli eta biziarekin aurrera jaraitzeko.