Asteburu honetan Txindurri eta Korrika izango ditugu

Gaur hasiko dugun aste bukaera jardueraz gainezka datorkigu. Txindurri dantza eta txistu taldeak bere egunak ospatuko ditu datorren larunbat eta igandean. Ekitaldiei bihar arratsaldean emango zaie hasiera, sei eta erdietatik aurrera Adolfo Jainaga trikitilariaren musika eta emanaldiarekin. Iluntzeko zortzietan, larrain dantza egingo da nahi duten guztiek dantzatu ahal izango dutena.

Igandean egunari hasiera emango zaio goizeko 10etan, txistularien dianarekin. Ordu bete beranduago, taldeko dantzariek kalejira egingo dute. Eguerdiko hamabi eta erdietan hainbat taldek dantza-erakustaldia egingo dute, herriko plazan.

Korrika

Igandean ikusmin handia sortu eta partaidetza ugari bilduko duen ekimena KORRIKA izango da. AEK-k euskararen alde bi urterik behin antolatzen duen herri martxa gurera ailegatuko da eguerdi aldera, Mallabiatik. Karrerak hainbat kilometro beteko ditu hirigunetik, kolektibo ezberdinen ordezkariak lekukoa txandakatuz eramango dutelarik. Gure kaleetatik bere ibilbidea bete ondoren, Eibarrerantz abiatuko da.

Egitaraua

12:10etan: Badator KORRIKA
14:30etan: Herri bazkaria