Santixauak iragartzeko kartel-lehiaketa zabalik

Udal kultur sailak 2007ko ‘Santixauak’ iragarriko dituen kartela aukeratzeko lehiaketaren oinarriak argitaratu berri du. Lehiaketara aurkeztu nahi duten guztiek ekainaren 13ra bitarteko epea izango dute lanak entregatzeko. Lehiaketako oinarriekin bat etorriz, artearekin zerikusia duten epaimahaikideek hiru kartel aukeratuko dituzte, aurkeztutako lan guztien artetik. Ondoren, lan horiek Jai Batzordera eramango dira, bertan aukeratuko baita kartel irabazlea. Lehiaketa irabazten duen autoreak 600 euro eskudirutan jasoko ditu. Aukeratutako kartela herriko jaiak iragarriko ditu eta argitaratuko diren egitarauen portada ere izango da. Oinarriek diotenez kartela egiteko erabili daitekeen teknika eta gaia libreak dira. Originalak kultura sailean, Komentukua kaleko eraikinean, aurkeztu behar dira lanegunetan, goizeko 8etatik arratsaldeko ordu 2etara bitartean. Lehiaketako azken bi edizioak Ernesto Etxabe eibartarrak irabazi ditu.