‘El Rayo’ filmaren proiekzioak agur esango zineklubari irailera bitartean

Maiatzeko eta denboraldiko zineklubaren azken emanaldia dugu aste honetakoa. Ermua Antzokiaren zine programazioak agur esango eta atseden hartuko irailera bitartean. Azken emanaldian Fran Araujok eta Ernesto Novak zuzenduriko ‘El Rayo’ filma proiektatuko dugu, astean gauzatzen ari garen Kulturen arteko jardunaldien baitan txertatzen dena.

Hassanek 13 urte eman ditu lanean Espainian. Orain krisialdiaren eraginez lanik ez dagoela eta, bere jaioterrira bueltatzea erabaki du. Aurrezki guztiak bigarren eskuko traktorea erosteko erabili ditu, horrekin lan egin eta biziraute espero baitu. Baina horren aurretik penintsula batetik bestera zeharkatu beharko du.

Filma ez dago gertakizun batean oinarritua, bizitzako istorio erreala baita. Horren protagonista ez da aktorea, Marokotik Espainiara esku hutsik etorri zen immigrantea baizik, abentura eta drama uztartzen dituen lana da. Errepideko bidaian grabatutakoa. Duintasunari buruzko istorio gordina. Edozein ezustekori aurre egiteko gauza diren eta bizirik jarraitzen duten pertsonena. Hogeita hamar kilometroko abiaduran kontaturiko istorio bizizalea.

El Rayo Donostiako azken Zinemaldian aurkeztu zen, Zuzendari Berrien atalean. Filma Antzokian proiektatuko da, arratsaldeko zortzi eta erdietatik aurrera.

Argibide gehiagorako ikus Ermua Antzokiaren mikrositea.