Aitor Hernandezek beste garaipen bat eskuratu du Euskadiko XCO Openean

Aitor Hernandez txirrindulari ermuarra gailendu da asteburuan Zallan jokatu den Euskadiko XCO Openeko azkenaurreko proban. Horrela, modu ezinhobean eman dio amaiera denboraldiaren lehen zatiari.

Specialized taldeko kirolariak ordu eta erdian egin zuen 33 kilometroko lasterketa, gainontzeko parte-hartzaileak atzean utzita. Bigarren sailkatuak, Alexander Ordeñanak, ermuarrak baino hiru minutu eta hamahiru segundo gehiago behar izan zituen.

Egungo Espainiako Ziklokrosseko txapelduna da Hernandez, eta Euskadiko BTTko Txapelketa, lau garaipen eta bi bigarren postu eskuratu ditu denboraldiaren lehen zati honetan. Txirrindulariak adierazi duenez, “oso gustura” dago egindako aurrerapenarekin, eta “fisikoki ondo” sentitzen dela azaldu du. “Orain deskantsatu egingo dut, eta datorren denboraldirako prestakuntzen azken faseari ekingo diot”, kontatu du ermuarrak.

Lasterketako sailkapena eta horren inguruko datuak topa ditzakezue argazkien azpian gehitu dugun loturan.