Sallabente auzoa, festa giroan murgilduta

Aste honetan zehar ospatzen dira Ermuko Sallabente auzoko jaiak, eta ekitaldiz betetako programa osatu dute Jai Batzordeko kideek.

Astelehenean hasi zen Gazte Kultur Astea oka eta partxis txapelketarekin, eta ostiralean amaituko da, orduan izango baitira lehiaketako finalak. Egun berean, Ertaroko Azoka Handia zabalduko dute arratsaldeko seietan. Asteburu osoan zehar irekita egongo da, eta jaietako ekimenik garrantzitsuenetako bat izango da, ezbairik gabe.

Larunbatean, solidaritatez blai hasiko da eguna, “Minutos por Sanfilippo” Mendi Bizikletako lasterketa izango baita goizeko 9:00etan. Kronoeskalada horren helburua Sanfilippo sindromeak jotako gaixoen alde dirua biltzea izango da. Igel eta mus txapelketak, sardina eta saiheski banaketak eta gaueko berbenak, besteak beste, osatuko dute eguna.

Futbolin txapelketarekin iratzartuko da igandea, eta tute txapelketak hartuko dio erreleboa arratsaldean. Voces Navarrasen jotek eta Versionariosen berbenak emango diote amaiera Sallabenteko jaiei.

Festetako egitarau osoa lotura honetan ikus dezakezue.