Ermuko Udalak erabat ukatu du Hacking Team konpainiarekin harreman komertziala edo kontratuzkoa eduki izana

Ermuko Udalak herriko bizilagunei argi utzi nahi die ez duela inolako harremanik izan Hacking Team konpainiarekin, ez komertzialik, ez kontratuzkorik ere, hedabide batek gaur argitaratu duenaren harira.

Albistea ezagutu orduko, Alkatetza Alorrak Kontratazio Departamentuari agindu dio Udalaren eta enpresa ezberdinen arteko kontratu guztiak berrikusteko, eta argi gelditu da ez duela konpainia horrekin inongo loturarik izan.

Carlos Totorika Ermuko alkateak azpimarratu du lehenengo aldia dela izen hori entzuten duena, eta Ermuko kontratazioen gardentasuna defendatu du.

Horren harira, Gobernu Taldeak gardentasunaren alde urteetan zehar egindako apustua argia dela adierazi du. Gainera, Udalak egiten dituen kontratazio guztiak publikoak direla eta bere webgunean argitaratzen direla azaldu du, edozeinek baldintza guztiak ikusi ahal izateko.