El Arrebato, festaz blai datorren asteburuko protagonista

Pixkanaka ari da gerturatzen asteburua, eta Ermua jai-giroan sartuta dago jada. Bide horri jarraiki, larunbata ekitaldiz josita dator geurera.

Jai-egun potoloenen aurreko asteburu honetan, El Arrebato musikari sevillarraren kontzertua izango da protagonista nagusia. 45 urteko abeslariak "La música de tus tacones" diskoa aurkeztuko du Ermuan, izen bereko biraren parte eskainiko duen kontzertuan.

Bederatzi disko kaleratu ditu jada El Arrebatok, eta lotura honetan entzun dezakezue bere azken abestia, "Eres mi fiesta", duela egun gutxi aurkeztu duena.

Kontzertua San Pelaio plazan izango da larunbatean, uztailak 18, gaueko 23:30etik aurrera.

Ekitaldiz betetako eguna

El Arrebatoren kontzertuak amaiera emango dio goizeko lehen orduetatik ekimenez beteta datorren larunbatari.

Goizeko zortzietan hasiko da agenda, Mallabiko Pedro Deunaren zelaian izango den txakurren erakustaldi-lehiaketarekin; bederatzietan, areto-futbol txapelketako azken fasea hasiko da Okin Zurin; hamarretan, Urkora igoera kontrolatua eta arku-tiro proba… Horrela, egun osoan zehar, era guztietako hainbat txapelketa eta lasterketa jokatuko dira. Den-denak kontsulta ditzakezue 2015eko Santixauetako programa ofizialean.