Liburu digitalak doan deskargatzeko zerbitzua ezagutzera emateko kanpaina

Udal liburutegiak, KZ Gunearekin eta Ermuko Merkatarien Elkartearekin elkarlanean, orri-markatzaileak banatuko ditu liburu digitalen mailegu zerbitzuari buruzko informazioa emateko. Zerbitzu horrek eLiburutegia du izena, eta Euskadiko Irakurketa Publikoko Sarean jarri da martxan liburu digitalak doan eta modu legalean deskargatu ahal izateko.

Ermuko liburutegiak eskaintzen du zerbitzua, baina KZ Gunea da erabiltzaileei laguntza ematen diena, euren gailuetan (ordenagailu eramangarriak, e-readerrak, tabletak, smartphonak…) sistema erabili ahal izateko. Bestalde, irakurketarako gailu elektronikoak saltzen dituzten denden hartuko dute parte kanpainan, euren bezeroen artean orri-markatzaileak banatuz.

Liburuen mailegu zerbitzu digitala erabiltzeko baldintza bakarra Ermuko liburutegiko edo sareko beste edozeinetako bazkide izatea da. Laguntza pertsonalizatua behar izanez gero, Teresa Murga eraikineko KZ Gunera jo beharko da.