Sagarra Gastro Pub, Ermuko Kazuelita Lehiaketako irabazle

Astebetez zapore ezberdinak dastatu ostean, epaimahaiak erabaki du Sagarra Gastro Pub dela aurtengo Kazuelita Lehiaketako garailea.

Lobiano Gastronomi Elkarteak antolatzen duen lehiaketaren VI. edizioa izan da aurtengoa, eta guztira 25 taberna eta jatetxek hartu dute parte. Guztien artean, proposamen tradizionalak nahiz plater berritzaileak aurkeztu dituzte.

Sagarra Gastro Pubek sortu du aurtengo garailea, “Itsas-lur” izenekoa, eta kardua, ‘polvo de hadas’ eta urdaiazpiko iberikoa uztartzen ditu.

Urkaregi jatetxea bigarren postuan sailkatu da “Urkaregi” kazuelitarekin. Bertan, txitxirioak, bakailaoa eta azalorea batu dituzte.

Elgoibarko Belaustegi jatetxeko Josu Muguerzak eta Ady Henriquezek, Durangoko Kobika jatetxeko Koldobika Cortabitartek eta Zestoako Bainuetxeko jatetxeko Javier Peñak osatu dute epaimahaia.

Lobiano Gastronomia Elkarteko kideek eskerrak eman dizkiete parte hartu duten taberna eta jatetxe guztiei, eta aste osoan zehar, eguraldi txarra izan arren, kazuelitak probatzera kalera irten diren pertsona guztiei.