The Allnighters gasteiztarren kontzertua izango dugu larunbat honetan Ermuan

Rhythm and bluesa izango da protagonista larunbat arratsalde-iluntzean Lobiano Kulturgunean. The Allnighters talde gasteiztarrak kontzertua eskainiko du 20:00etatik aurrera, euren “SoulfulRhythm&Blues” doinuak aurkezteko.

The Allnighters 1988ko uda beroan jaio zen, rhythm and blues deitzen den obsesioak jota zeuden bost lagunen eskutik. Hutsetik abiatu eta gogotik lan eginda, penintsulako erreferentziazko talde bihurtu zen 90. hamarkadan musika beltzaren arloan. Zuzeneko emanaldietan indar handiko taldea denez, milaka kilometro egin izan ditu, eta maila handiko musikariekin partekatu izan ditu agertokiak, estilo desberdineko hamaika musikarirekin, horien artean aipagarri, besteak beste, Wilko Johnson, Nine Below Zero, Barrence Withfield, Ian Dury, The Blues Brothers Band eta Eli Paperboy Reed.

The Allnighters Ermuan izango dira larunbat honetan 20:00etatik aurrera. Kontzertua Lobiano Kulturgunean izango da, eta sarrerak 8 euroren truke daude salgai aretoan bertan, BBKren kutxazainetan edota Kutxabanken webgunean.

Kontzerturako gogoa pizten joateko, gasteiztarren abesti bat uzten dizuegu, “Midnight Boogie”.