'Berbalagun'ek denboraldiari amaiera emateko jarduera bi antolatu ditu

‘Berbalagun’ ekimenak denboraldiari amaiera emango dio datorren astean. Arduradunek bi jarduera antolatu eta iragarri dituzte; lehena asteazkenerako eta bigarrena, ostiralerako. Asteazkenean, herrian zehar ibilbidea eginen dute emakumeen eta feminismoaren aztarnak ezagutzeko xedez. Ibilbide horretan borroka feministak eta emakumeek herriaren historiari egindako ekarpenak eta bertan utzitako aztarnak bisitatuko ditu taldeak.

Ostiralean, azken afaria dastatuko dute elkarrekin mintzapraktikako lagun eta kideek. Urkaregi jatetxean egingo da, gaueko bederatzi eta erdietatik aurrera. Aldez aurretik txikiteoa egin nahi dutenek, hitzordua Herga tabernan dute, iluntzeko zortzietan. Afariaren prezioa kideko 20 euro dira.

Jardueran parte hartzeko izena ematea beharrezko da erretserba egin ahal izateko. Izena eman nahi dutenek bi aukera erraz dituzte; 663 070 492 telefono zenbakira deitzea edo ermua_berba@aek.eus postontzira idaztea, ekintza bakoitza hasi aurreko bezpera artean.