Festa giroko kirol eta kultur ekitaldi izango ditugu igande honetan

Larunbat honetan hasiko da 2018ko Santixau jaietako programazioa, Huntzaren kontzertuak borobilduko duen ekitaldi sorta baten eskutik. Igandea, ordea, ez da atseden hartzeko eguna izango, herriko hainbat elkartek kirol eta kultur egitasmo ezberdinak antolatu baitituzte jai giroaz gozatzen jarraitzeko.

Igandeko egitaraua 09:30ean hasiko da bi kirol jarduera ezberdinekin: batetik, Santixauetako II. Padel Txapelketak aurrera jarraituko du eta partidu gehiago lehiatuko dira San Pelaioko pistetan; eta bestetik, Urko Mendiko Txirrindulariak elkarteak mountain bike martxa herrikoiaren XXIII. edizioa antolatu du, eta aipatutako orduan Orbe Kardinala plazatik abiatuko da.

San Martin plazak, aldiz, Draconia elkarteak antolatutako XVI. Blood Bowl txapelketa hartuko du 10:00etatik aurrera. Eta, ordubete geroago, benjaminen, alebinen eta infantilen txirrindulari lasterketak hasiko dira, Ermuko Txirrindulari Elkartearen eskutik.

Egunari amaiera ezinhobea emateko, Eirband taldeak bertsioen kontzertua eskainiko du 20:00etatik aurrera Martxoak 8 plazan.

• 2018ko Santixauetako egitarau osoa