Urteko azkenengo deialdiak odola emateko

Ermuko Odol Emaileen Elkarteak, Donaser izenekoak, odola emateko bi saio berri antolatu ditu datozen egunetarako, 2018. urteko azkeneko saioak, hain zuzen.

Larunbat honetan, abenduak 22, izango dugu lehenengo txanda, 09:15etik 14:00etara. Euskadiko Transfusioen eta Giza Ehunen Zentroak unitate mugikorra bidaliko du Ermura, Patxi plazara, odola herrian bertan eman ahal izateko, ospitalera joan beharrik izan gabe.

Bigarren txanda abenduaren 28an izango da, ostirala. Orduan, autobusa anbulatorio zaharraren aurrean kokatuko da, Bizkaia Etorbidean, 09:15etik 14:00etara eta 16:30etik 21:00etara.

Herriko odol-emaileak jakinaren gainean daude jada, deialdi bakoitzeko SMS eta e-posta bidezko mezuak jasotzen baitituzte.

Gaur egun, odola ematea da modu bakarra gure osasun-sistemak ondo funtzionatzeko beharrezkoak diren odol-osagaiak lortzeko (hematiak, plaketak eta plasma).

EAEn, joan den urtean 86.175 odol emanaldi egin zituzten 55.000 emaile boluntario eta altruistek, eta gure ospitaletako 50.000 gaixo izan ziren horren onura jaso zutenak.