‘Bubbles’ kontzertua aurkeztuko du Debabarreneko Orfeoiak igande honetan

Debabarreneko Orfeoia – DBOR abesbatza elkarteak kontzertu berezia eskainiko du igande honetan, uztailak 14, Bubbles – Ponpak izenburupean. Emanaldia 13:30ean hasiko da Ermuko Santiago Apostoluaren elizan.

Ana Agirre, Lisbeth Fuentes, Beatriz Agirre eta Pili Villar izango dira kontzertuko bakarlariak, eta egitarauak proposamen anitzak hartzen ditu barne, hala nola, Enya, La Oreja de Van Gogh edota Alan Troy Davis.

Kontzertuko egitarau osoa hemen kontsultatu daiteke.

Orfeoia 2016. urtean jarri zen martxan, lehenengo emanaldiak eskainiz. Debabarrena eskualdean musika sinfonikoa abesteko taldea sortu eta zaletu guztiak biltzeko asmoarekin sortu zen proiektua.

Jose Miguel Laskurainek zuzentzen duen abesbatzaren filosofia koru sinfoniko erako obrak abian jartzea da, baina taldekideek argi daukate helburu horretara iritsi ahal izateko, aldez aurretik beharrezkoa dela egokitutako abestiekin pauso sinpleagoak ematea.