Bizkaia Gazteak Durangaldeak, eskualdeko gazteen garapenerako motore

Bizkaiko Foru Aldundiak eta eskualdeko udalek sustatzen duten Bizkaia Gazteak Durangaldea programaren 2025. edizioari balantze positiboaz amaiera eman zaio, ehunka gaztek parte hartu baitute prestakuntza, partaidetza eta orientazio profesionaleko jardueretan. Programaren ekimenek gazteen garapen integrala sustatzea dute helburu, eta baita gazteriaren rola sendotzea lurraldearen eraldaketa sozialean. Urtean zehar hiru esku-hartze garatu dira: Gaztekimen, I’m Bizi eta Begirale Ikastaroa, gazteek dituzten behar, etapa eta errealitate ezberdinak kontuan hartuta diseinatutako ekimenak.

Gaztekimen: sarien banaketa

Gaztekimen Durangaldeko gazteen talentua, sormena eta konpromiso soziala bultzatzen dituen programa da, eta urte amaierako proiektu nagusia izan da. Orain egun batzuk, Durangoko San Agustin Kultur Etxean 2025eko edizioko sariak banatzeko ekitaldia egin zen. Ekitaldi horrek balioa eman zien parte hartu zuten taldeek garatutako ideiei, guztiak eskualdeko udalerriak hobetzeko eta eraldatzeko. Ermua-Mallabiko Hasierako Lanbide Heziketako Udal Institutuko ikasleek 2 sari jaso dituzte; lehena eta laugarrena.

Sarien zerrenda:

1. saria: “Gazteentzako hezkuntza finantzarioa”, Ermua–Mallabia HLZUIko ikasleak.
2. saria: “Zainduz konektatuz: belaunaldiak elkartzen”, Durangoko Oinarrizko LHko ikasleak.
3. saria: “Belaunaldiak Klub”, Durangoko Maristal ikastetxeko ikasleak.
4. saria (aurkezpen onenari): “Parte-hartze digitalerako plataforma”, Ermua–Mallabia HLZUIkoak. Ikasleek emandako saria.

Edizioan zehar, gazteek eskualdeko benetako erronkak landu dituzte, eta proposamen berritzaileak egin dituzte, gizarte-kohesioa, aniztasuna, inklusioa eta udalerrietan eragin positiboa sustatzeko. Programak oso parte-hartze handia izan du, eta gazteriaren sormena eta herritartasun aktiboa bultzatzen dituen erreferente bihurtu da.

I’m Bizi: Orientazioa, etorkizun akademikoa eta lan-ingurunearekin lotura

I’m Bizi programak urtez urte erakartzen duen interesa berresten du, eta 2025eko edizioan 500 gazte baino gehiago elkartu izan dira eskualdean, etorkizun akademiko eta profesionala planifikatzeko saio dinamikoetan parte hartuz. DBHko 4. mailako ikasleen eta ingurune sozioekonomikoko profesionalen, erakundeen eta baliabideen sarearen arteko lotura-puntua izan da ekimena.

Begirale Ikastaroa. Aisialdi hezitzailean prestakuntza

Begirale Ikastaroak aisialdi eta denbora librearen arloan ziurtagiri ofiziala eskaintzen du, eta horrek hezkuntza-, gizarte- eta aisialdi-esparruetan ate berriak irekitzen dizkie parte-hartzaileei.