Ermua Antzokiko pantailan film sarituenak ikusgai izango

Ostegunean zine aste berri bati hasiera emango diogu Ermua Antzokian. Zineklubaren saioak Ruben Östlund zuzendariaren ‘El triángulo de la tristeza’ izenburuarekin irekiko du eskaintza. Filma suediarra da, 149 minutu irauten duen komedia dramatikoa, Ruben Östlund zuzendariarena. Jatorrizko gidoi, filma eta zuzendaritza onenaren izendapenak izan ditu Oscar sarietan. Film onenaren Urrezko Palma jaso zuen Cannesko zinemaldian. Eta beste 3 izendapen ditu BAFTA sarietan eta Urrezko Globoetan. Modaren Astearen ondoren, Carl eta Yaya, modelo eta influencer bikotea, yate batera gonbidatzen dituzte luxuzko itsas bidaia batean. Ostegunean iluntzeko zortzi eta erdietan.

Zinema komertzialaren atalean, larunbat arratseko zazpi eta erdietan eta astelehen iluntzeko zortzi eta erdietan ‘Todo a la vez en todos partes’ lan garaile eta saritua ikusi ahal izango dugu. Dan Kwanek eta Daniel Scheinertek zuzendutako Ipar Amerikako ekoizpena da, 140 minutu irauten duena. 11 izendapen izan ditu Oscar sarietan eta, azkenean, 7 sari eskuratu ditu. BAFTAko eta Urrezko Globoetako izendapenak eta sariak ere baditu. Dimentsio arteko haustura batek errealitatea aldatzen duenean, etorkin txinatar bat Estatu Batuetan, abentura basati batean murgiltzen da, eta berak bakarrik salba dezake mundua.

Bigarren proposamen komertziala ‘Irati’ titulua da, euskaraz eskainiko dena gaztelaniazko azpitituluekin. Paul Urkijo Alijok zuzendutako ekoizpen nazionala da, berak idatzitako gidoia duena. Maite Arroitajauregi eibartarrak musika jarri dio. Akziozko eta zinema fantastikoko abentura da, 114 minutu irauten duena. VIII. mendean kokatuta dago. Kristautasuna Europan zehar hedatzen da eta sinesmen paganoak gainbehera doaz. Pirinioak zeharkatzean Karlomagnoren armadak aurrera egin zuela ikusita, haraneko buruzagiak antzinako jainkosa bati laguntza eskatzen dio. 5 izendapen ditu Goya sarietan eta 2 sari Sitgeseko Zinemaldian. Larunbatean gaueko 10etan eta igandean arratsaldeko zazpi eta erdietan ikusi ahal izango dugu.

Azkenik, ikusle gazteenentzako saioan, igande arratseko 5etan, ‘Momiak', marrazki bizidunetako abenturak proiektatuko dugu. Juan Jesús Garcíak zuzendutako ekoizpen espainiarra da eta 88 minutu irauten du. Lurraren erraietan momien hiria dago! Inperioaren aginduz, Nefer printzesak Thurtekin ezkondu behar du, ez batak eta ez besteak nahi izan ez arren; Neferrek aske izan nahi duelako, eta Thutek ezkontzari alergia diolako. Baina jainkoen asmoak ezeztaezinak dira.