Hogei gaztek parte hartuko dute hamar eguneko abentura eta ekintzetan

Ermuko Udaleko Hezkuntza, Kultura, Gazteria eta Kirol Sailak Uda Gazte Jolasak izeneko hiri udalekuak antolatu ditu. 13 eta 17 urte bitarteko hogei neska-mutilek parte hartuko dute programa honetan uztailaren 1etik aurrera, eta bi astez luzatuko da, 09:30etik 14:30erako ordutegian.

Uda Gazte Jolasak programako ekimenik gehienak herrian bertan egingo dira, eta parte-hartzaileak entretenitzeko eta garatzeko tailerrak eta jarduerak izango dira.

Uztailaren 4an eta 11n, ostegunetan, bi txango egingo dira: bata Debara, surfa egiteko, eta bestea Otxandiora, Hontza Extrem abentura parkera. Kasu horietan, ordutegia 17:00ak arte luzatuko da.

Aurtengo Uda Gazte Jolasetan izena eman duten gazte gehienak 13 eta 14 urte bitartekoak dira. Sukaldaritza, musika, mendi-ibiliak eta kirol-lehiaketak bezalako gaiekin lotutako aisialdiko eta denbora libreko jarduerekin batera, parte-hartzaileen ongizate emozional eta fisikoari, ingurumenaren sentsibilizazioari, parte-hartzeari eta lankidetzari buruzko hainbat alderdi landuko dira.