Ceuta hiriko argazkien erakusketa

‘Ceuta: hiria eta muga’ titulua duen argazki bilduma ikusgai dago udal liburutegiko erakusketa gelan. Argazkiak Fidel Raso argazkilariarenak dira eta hiriaren hainbat toki eta ezaugarri jasotzen dituzte. Erakusketa zabalik izanen da datorren otsailaren 15era bitartean, sartzea doan da. Erakusketa gela zabalik dago arratsaldeko 6etatik 8etara lanegunetan eta goizeko 10etatik ordu 1era larunbatetan. Argazkiak mugako hiri horren errealitatearen egunerokotasuna adierazten dute. Bilduma BBK erakundearen kultura alorrak utzitakoa da eta, aurrezki kutxa horrek liburuxka bat argitaratu du Tamara Crespo kazetariaren testuekin eta Raso beraren argazkiekin.

Liburuxka horretan adierazten denez ‘Topikoa dirudien arren, Ceuta ezezagun handia da, bere herrialdean bertan. XX. mendearen zati handi batean, Ceutari buruz penintsulan zeuden erreferentzia bakarrak soldaduska eta legioa ziren. Izaera militarrarekiko lehentasunezko arreta hori mugarantz lerratu da gaur egun. Izan ere, Ceuta –Fidel Rasok erakusketa honen izenburuan dioen moduan– hiria eta muga da. Kasu honetan, Maroko herrialde azpigaratuarekiko muga. Hesi bikoitzeko zortzi kilometro daude herri baten eta bestearen artean. Ceutako Hiri Autonomoa bizitza osoan izan da kulturen arragoa, ez soilik orain’.