Errepide berria erabilgarri Gipuzkoa Etorbidean

Campezo enpresak Ermutik igarotzen den 634 errepide nazionala asfaltatzeko lanetan jarraitzen du. Gaur, ostirala, jada nahikoa normaltasunez igaro daiteke Gipuzkoa Etorbidetik; izan ere, San Lorenzo ikastetxetik Abeletxeko tunelera doan bidea jada asfaltatuta eta margotuta utzi dute langileek, lerro hauen ostean uzten dizkizuegun argazkietan ikus daitekeen moduan.

Datozen orduetan lanek Bizkaia Etorbidean jarraituko dute Areition amaitu arte, autopistako ordainleku berriaren inguruan. Horrela, Ermutik igarotzen den 634 errepide zati osoa egoera ezinhobean geldituko da.

Aurrez iragarri genuen bezala, obrak abuztuaren 28an, asteartea, amaituko direla aurreikusten da, betiere eguraldia lagun izaten bada.

Hautatutako datekin, ohi baino afekzio gutxiago izango dira, herrian mugimendu gutxien izaten den hilabetea baita abuztua. Dena dela, herritarrei laguntzeko eta ulerkorrak izateko eskatzen zaie, lanek irauten duten bitartean aparkaleku batzuk libre utzi beharko baitira.