‘3R Tokiko Enplegua’: lan-orientazioko programa langabeentzat

Ermuko Garapen Ekonomikorako udal Sailak '3R Tokiko Enplegua' izeneko programa hasiko du laister, enplegua galdu eta enplegagarritasun-aukerak hobetu nahi dituzten pertsonei laguntzeko, berriro ere lan-merkatura itzultzeko xedez. Bizkaiko Foru Aldundiak finantzatzen du programa hau gure udalarekin batera.

‘3R Tokiko Enplegua’ programak lau hilabeteko iraupena izango du; abenduaren 1ean hasiko eta martxoaren 31n bukatuko da, biak barne. Sailak irekita dauka parte hartu nahi duten pertsonak hautatzeko prozesua. Partaideek banakako zein taldekako lan-orientazioa jasoko dute. Taldeko kideak bere profilarekin edo ezaugarriekin hobekien bat datozen lan-eskaintzak bilatzen ikasiko dute. Halaber, aurkezten diren enpresen hautaketa-prozesuen faseei aurre egiteko modurik onenak zeintzuk diren ikasi eta praktikatuko dituzte.

‘3R Tokiko Enplegua’ izeneko programan parte hartu ahal izateko, interesdunek baldintza hauek bete behar dituzte:

• Langabezian eta Lanbiden alta emanda egotea.
• Bizkaiko edozein udalerritan erroldatuta egotea.

Parte hartu nahi eta baldintzak betetzen dituztenek Ermuko Udaleko Enplegu Zentroan eman dezakete izena, Konbentukoa kaleko 5.ean eta baita argibideak jaso. Izen-ematea baita 943 17 91 51 telefonora deituz ere egin daiteke.