Abalorio eta magia taillerak Ermuko liburutegian

Ermuko Udal liburutegiak haurrentzako bi tailer antolatu ditu urria eta azaroa bitarterako.

Lehenengoa 2018an eta 2019an jaiotako haurrei zuzendutako abalorio tailerra da. Jarduera lau saiotan emango da, bakoitza ordubetekoa, elkarren segidako lau asteartetan: urriaren 22an eta 29an eta azaroaren 5ean eta 12an. Tailerra euskaraz izango da 17:30etatik 18:30etara liburutegian bertan.

Lau saio horietan, tailerrean parte hartzen duten haurrek eskulanak egin ahal izango dituzte, hala nola eskumuturrekoak, gerrikoak edo zintzilikarioak. Gainera, kikarak eta mugikorren fundak apaintzen, arropa pertsonalizatzen eta boligrafoak eraldatzen ikasiko dute, besteak beste.

Abalorioek sormena garatzea ahalbidetzen dute, bakoitzari bere eskulanetan diseinu bakar eta pertsonalizatuak sortzeko aukera ematen diotelako. Horrek irudimena eta arazoak sormena erabiliz konpontzeko trebetasuna sustatzen ditu. Gainera, abalorioekin lan egiteak kontzentrazioa areagotzen eta haurren motrizitate fina hobetzen ere laguntzen du, zehaztasuna eta trebetasuna behar baitira apaingarriak harian sartzeko.

Abalorioak eginez, oinarrizko kontzeptu matematikoak ikas daitezke, hala nola kontatzea, sailkatzea eta ordenatzea, eta eskuen eta hatzen elastikotasuna eta mugikortasuna indartzen dira.

Programatutako bigarren jarduera 2015, 2016 eta 2017 urteetan jaiotako haurrentzako magia tailerra da.

Ekimen honetan parte hartzen duten pertsonek hainbat trebetasun garatu ahal izango dituzte, beren motrizitatea probatu, memoria eta kontzentrazioa aktibatu eta trikimailu batzuk ikasiko dituzte, hala nola txanpon bidaiaria, ibiltzen den ura, tinta ikusezina, billeteen lebitazioa edo sokaren ihesa, besteak beste.

Magia tailerra euskaraz izango da eta ordubeteko lau saio izango ditu lau ostegunetan jarraian: urriak 24 eta 31 eta azaroak 7 eta 14. 17:30etik 18:30era izango da jarduera, liburutegian bertan.

Bi tailerretan izena ematea doakoa da, baina, plaza lortuz gero, lau saioetara joateko konpromisoa hartzen da. Plazak mugatuak dira eta izena urriaren 16ra arte eman daiteke liburutegian, 943 17 92 12 telefonora deituz, WhatsApp bidez (https://wa.me/34943179212) edo e-mail bidez biblioteca@udalermua.net helbidean, izen-abizenak, liburutegiko txartel-zenbakia, haurraren jaiotze-data, harremanetarako telefonoa eta helbide elektronikoa aurkeztuz.

Izen-emateak eskainitako plazak baino gehiago badira, lekuak zozketa bidez esleituko dira eta Ermuan erroldatutakoek lehentasuna izango dute. Onartutakoen zerrenda urriaren 17an argitaratuko da udalaren webguneko iragarki-taulan, eta izena eman duten guztiei bidaliko zaie e-mailez.