Abian da 2025-2026 ikasturteko Ermuko Ingurumen Hezkuntzako Programa

Ermuko Udalak ikastetxeei zuzendutako 2025-2026 ikasturteko Ingurumen Hezkuntza Programa abian jarri du. Urtero bezala, lehen hezkuntzako ikasle guztiek natura eta ingurune hurbila ezagutzea eta ohitura iraunkorragoak hartzea sustatzen duten jardueretan parte hartzeko aukera izango dute.

Programak 30 urte baino gehiagoko ibilbidea du, eta gazteenen artean ingurumenarekiko sentsibilizazioa eta errespetuzko jarrerak sustatzea du helburu. Ikasturte honetan, besteak beste, hondakinen kudeaketa, basoko eta ibaiko ekosistemak, mugikortasun jasangarria, aldaketa klimatikoa eta baserriko bizimodua bezalako gaiak jorratuko dira.

Jarduerak ikasturte osoan zehar egingo dira Ermuko ikastetxeetan, gela barruko saioak eta ingurunera irteerak tartekatuz, ikasleek hurbilen duten errealitatea bertatik bertara ezagut dezaten.

Ekimen honekin, Udalak hezkuntzarekin eta Ermuarentzat etorkizun iraunkorrago bat eraikitzearekin duen konpromisoa indartzen du.