"Artarraik" aurten berrogeita hamargarren urteurrena ospatuko du

"Artarrai Mendi Taldeak" berrogeita hamar urte beteko ditu aurten sortu zenetik, mugarri azpimarragarria. Mende erdi hori dela eta, Artarrai M. T. elkarteak egitarau zabala prestatu du, zeina irailetik azarora bitartean gauzatuko dena. Jarduera eta ekintzen artean denetarik izango da, aukera zzabala: elkartearen ibilbidea errepasatzen duen argazki erakusketa bat, 1974an Everestera egindako "Tximist" espedizioari buruzko diaporamaren proiekzioa, hitzaldi hainbat, bazkari herrikoia eta erromeria, mendiko zine proiekzioak, txangoak, gehigarri berezi bat herriko "Drogetenitturri" aldizkarian, eta plaka eta kamiseta oroigarria, besteak beste.

Artarraik gaur egun 630 bazkide ditu eta urte osoan zehar ekintzak antolatzen ditu. Era guztietako jarduerak, mendia ardatz dutenak, bere masa sozial osoaren gustuak asetzen dituztenak: zeharkaldiak, asteburuko txangoak, kanoien jaitsiera, elurretara raketekin egindako irteerak, lur orotako bizikletaz egindako ibilbideak (BTT), haurrentzako jarduerak, hitzaldiak, askotariko prestakuntza-ikastaroak, GPSak erabiltzen ikastekoak, Federazioaren aurreko izapideak, materialaren alokairua... eta abar luze bat, azken berrogeita hamar urteetan egin ohi duen bezala.

Bihar, irailak 16, asteartea, programaren lehen jarduera izango da. Alde batetik, ‘Artarrai’ren argazki zaharren erakusketa Lobiano Kulturgunean, arratsaldeko sei eta erdietatik aurrera zabalik egongo dena, bi astez. Eta "Tximist" erakusketa 19:00etan. Diaporamak Everesterako lehen igoera erakutsiko du, Txomin Uriarteren gidaritzapean.

‘Artarrai’ taldeak eskerrak eman nahi dizkie urte hauetan guztietan lagundu duten lagun guztiei eta herritar guztiei antolatutako jardueretan parte hartzeko gonbitea luzatzen die.