Artarraik ‘Ireki begiak, erne belarriak’ ekimenaren edizio berria antolatu du

‘Artarrai Mendi Taldea‘k aste honetan gauzatuko du ‘Ireki begiak, erne belarriak’ izenaz ezagutzen dugun mendi ibilbidea; gure biodibertsitatearen, faunaren, botanikaren eta iraganeko aztarnen aberastasuna xehetasunez ezagutzeko udalerriaren inguruko txangoa oinez. Lau kilometroko eta zailtasun txikiko ibilbide laburra da, 3 edo 4 ordutan egitea aurreikusten dena, gure ingurune hurbilenaz arretaz eta patxadaz gozatu ahal izateko. Jarduera irekia eta doakoa da.

Txango eta jarduera 9:00etan abiatuko da Patxi plazatxotik. Ibilbidean zehar Txara, Bialbe edo Egurmendi bezalako tokiak zeharkatuko ditu eta Errekalden amaituko da. Azken puntu honetan, antolatzaileek hamaiketakoa emango diete parte-hartzaileei.

Ibilbidean zehar, arreta berezia jarriko du inguruko hegaztiak, intsektuak eta landareak behatzeko eta horien inguruko azalpenak emateko. Horiek guztiak oso garrantzitsuak dira habitaterako eta ingurumenerako. Ibilaldian, espezie autoktonoei buruz hitz egingo da; espezie inbaditzaileek duten eraginaz, baita inguruneko geologiaren zenbait alderdi nabarmengarrienei buruz ere.

Naturarekin gozatzeko, ikasteko eta konektatzeko aukera, familia- eta hezkuntza-giroan.