Berdindu! informazio zerbitzua aste honetan Ermura etorriko da

Berdindu! Eusko Jaurlaritzaren zerbitzu publikoa da, sexu- eta genero-aniztasunarekin lotutako gaiei buruzko informazioa emateko eta kontsultei erantzuteko xede duena. Berdindu!k ahalegin berezia egingo du 2025ean, herritarrengana hurbiltzeko eta herritar gehiagorengana iristeko.

Ezagutze eta hedatze horren esparruan, zerbitzua modu ibiltarian arituko da Erkidegoko herri eta landa-ingurunetan. Ermua izango da zerbitzu hori hartuko duen Bizkaiko lehen udalerria; ekainaren 18an gurean izango da, Emakumearen Topagunean, 13:00etatik 19:00etara.

Berdindu! ekimenak, batez ere, gay, lesbiana, trans, bisexual eta intersexualei eta haien inguruari arreta, informazioa eta laguntza ematen die. Baina ez hori bakarrik, hezkuntza-komunitatearekin, eragile sozial eta profesionalekin, komunikabideekin eta, oro har, gizartearekin ere lan egiten du. LGTBI kolektiboaren inguruan dauden fobia eta aurreiritzi guztiak desagerraraztea du helburu, eta, horretarako, informazio egiazkoa eta egiaztatua eskaintzea baino hoberik ez dago.

Adopzioei edo familia-eredu berriei buruzko laguntza edo informazioa behar baduzu, sexu-orientazioagatiko edo identitateagatiko jazarpen edo diskriminazio kasuren bat ezagutzen baduzu, transexualitatearekin edo LGTBI komunitateari eragiten dion beste edozein alderdiri buruzko indarreko legeei buruzko informazioa nahi baduzu, zatoz Emakumearen Topagunera datorren asteazkenean edo deitu 943 17 10 30 telefonora eta hartu hitzordua.