Carmen Moralesek Rocío Dúrcal omenduko du Ermua Antzokian

Juan Carlos Rubiok idatzi eta zuzendutako “Rocío Dúrcal es inolvidable” lana antzeztuko da ostiral honetan, urriaren 23an, 20:30ean, Ermua Antzokian. Carmen Morales (Rocío Dúrcalen alaba) eta Alejandro Vera dira ikuskizunaren protagonistak eta 90 minutuko iraupena du.  Sarrerak 12 euroan daude salgai.

Istorioa Carmen Moralesek jasotzen duen gonbidapen batetik abiatzen da: amaren bizitza eta abesti ezagunenak ardatz izango dituen musikalean protagonista izatea. Hasieran ideia baztertzen badu ere, Juan Carlos Rubio egile eta zuzendariak libretoa elkarrekin irakurtzea eta beharrezkotzat jotzen dituen aldaketak egitea proposatuko dio. Topaketa horretatik abiatuta, familiako oroitzapenak, pasadizoak eta Rocío Dúrcalen ibilbide artistikoko hainbat pasarte errepasatuko dituzte biek.

1944an Madrilen jaioa, Rocío Dúrcal gaztelaniazko musikaren artista ezagunenetako bat bihurtu zen. Zineman hasi zuen ibilbidea, eta ospe handia lortu zuen musikaletan, abeslari gisa sendotu aurretik. Ordutik, bere abestiek belaunaldi askoren oroitzapenetan bizirik jarraitu dute. Hainbat arlotan moldatzeko zuen gaitasunari eta publikoarekin konektatzeko erraztasunari esker, oso artista maitatua izan zen Atlantikoaren bi aldeetan.

Ikuskizunak Rocío Dúrcalen bizitzako eta ibilbide artistikoko hainbat pasarte berreskuratzen ditu, hasierako urteetatik nazioarteko arrakasta lortu zuen arte, haren alderdi pertsonala eta familiarra ahaztu gabe. Antzezpenaren, musikaren eta umorearen bidez, artistaren atzean zegoen emakumea ezagutzeko eta haren bizitzako unerik hunkigarrienetako batzuk gogora ekartzeko aukera eskaintzen du lanak.