Ermuak "Hiri Agenda Txikia" aurkeztu du, hiri-plangintzan haurrek parte hartzeko eredu gisa

Ermuko Udalak gaurkoan, A Coruñan egiten ari den Espainiako III. Hiri Foroaren esparruan, 'Hiri Agenda Txiki'aren garapenean duen esperientzia aurkeztu du, Espainiako Hiri Agendaren printzipioak eta Garapen Iraunkorreko Helburuak (GIH) udalerriko ikastetxeetako 5 eta 10 urte bitarteko ikasleengana hurbildu dituen ekimen aitzindaria.

Isabel Rodríguez Etxebizitza eta Hiri Agenda ministroaren aurrean egin du aurkezpena, bera izan baita foroaren buru. Sant Boi de Llobregatek eta Ermuak beren esperientzia aurkeztu dute, Ministerioak tokiko eredu berritzaileak garatzeko pilotu gisa hautatu dituelako.

Beatriz Gamiz Ermuko alkateak herrian egindako prozesua azaldu du, eta azpimarratu du, haurrentzako bereziki diseinatutako material hezitzaileen bidez — "Hiri Agenda Txikia" koaderno ludikoa, adibidez — eta ikastetxeen inplikazio zuzenaren bidez, benetako elkarrizketa sortu dutela haurrekin eraiki nahi duten hiriari buruz.

"Gure ustez, hiri-plangintzak ahots eta ikuspuntu guztiak bildu behar ditu, baita haur edo gaztetxoenak ere. Hiri Agenda Txikiari esker, gaur diseinatzen dugun etorkizuna gehien biziko dutenen begiradatik entzun, ikasi eta eraiki ahal izan dugu hiria ", esan du alkateak.

Proiektua Ermuko Hiri Agendaren Tokiko Ekintza Planaren barruan kokatzen da, 2022an onartu zena, eta berrikuntza, jasangarritasuna, kohesio soziala, berdintasuna eta herritarren parte-hartzea zeharka biltzen dituena. Hezkuntza-komunitatearekin elkarlanean aritzeak indartu egiten du Udalak hiri-plangintza inklusiboagoa, pedagogikoagoa eta belaunaldien arteko ekitatearekin konprometituagoa izateko duen konpromisoa.

Esperientziak interes handia piztu du foroan parte hartu dutenen artean, beste udalerri batzuetan egin daitekeenaren adibide gisa, Ermuak tokiko inguruneetan politika publiko berritzaileak bultzatzeko erreferente nazional gisa duen zereginari balioa emanez.