Europako Parlamentuaren enbaxadore diren Bizkaiko Eskolen Topaketa

Europako Parlamentuaren enbaxadore diren hiru ikastetxeetako hogeita hamar bat ikasle Ermuan bildu dira gaur, beraien irakasleekin batera, elkar ezagutzeko, hausnartzeko, ikuspegiak partekatzeko eta elkarrekin lan egiteko saio batean. Juan Carlos Abascal alkateak harrera egin die goizeko 9:20etan udaletxeko Osoko Bilkuren aretoan eta ongietorria eman die. "Zuentzat berehalakoa eta, jada, zain daukazuen etorkizunerako ikasi eta presta zaitezte; mundua zeharkako izango denez, guztiekin enpatizatu eta haien lekuan jarri beharko baitzarete", trebatzen jarraitzeko gonbidapena egin die, baita "gure gizartearekiko, bere balioekiko eta demokrazia parte-hartzailearen ereduarekiko" interesa lantzen jarraitzeko ere. Europa eta bere legebiltzarra "garrantzitsuak dira batzen gaituztelako eta lurralde gisa ordezkatzen gaituztelako" bukatu du.

Ikastetxe bakoitzeko bozeramaileek EBko herrialdeetara edo parlamentu kontinentalaren egoitzara egindako bisitak azaldu dituzte, baita parte hartzen duten proiektuak ere, hala nola Erasmus, Olinpiadak, sentsibilizazio-kanpainak eta abar. Lehen harreman horren ostean, gosari arin bat partekatu dute, atikoan lanera bildu aurretik, ikus-entzunezkoak ikusteko eta inpresioak trukatzeko. Hainbat dinamika landu dituzte taldeka, hainbat gairi buruzko alderdiak bateratuz eta horiek ingelesez landuz.

Eguerdia baino lehen egunari amaiera eman diote taldeetan landutakoaren emaitzak  partekatu ondoren. San Pelaioko ikasleek, herriko anfitrioi gisa, Bilboko Botikazar BHIko eta Durangoko Jesuiten ordezkariak agurtu dituzte, etorritakoak beren herrietara ETSren trenean bueltatzeko bidaiari ekin aurretik.