'Folkez Blai'ren XX. edizioa bihar hasiko da, lehiaketari ekin aurretik

‘Folkez Blai’ lehiaketak hogei urte beteko ditu eta, jada, prest dago guztia musikari ekiteko. Jarduera egitaraua bihar hasiko da Alboka Musika Eskolako eta Foularedako taldeen kalejirarekin, 19:00etatik aurrera, lehiaketa hasi aurreko egunean. Zuzeneko emanaldien azken fase hau irailaren 12tik (ostirala) 14ra (igandea) bitartean jokatuko da Orbe Kardinalaren plazan. Sei dira finalerako sailkatu diren taldeak: Ache Pa Ti (Nafarroa), Harribitxi (Euskadi), Xara (Madril), Matazua (Asturias), Entós (Asturias) eta Gorrondatxe (Euskadi).

Lehiaketaren xedea sustraiko musika sustatzea eta folk generoa jorratzen duten musika taldeak ezagutzera emateko bidea izatea da.Gainera, lekua egiten die lehiaketatik at gonbidatzen dituzten musikari eta talde finkatuei, kaleak musikaz betetzeko eta astebururako kartel erakargarria osatzeko.

Hurrengo hiru egunetako programa eta emanaldi bakoitzaren ordua honakoa da:

• Irailak 12, ostirala 
  • 18:30ean: Ache Pa Ti (Nafarroa)
  • 19:45ean: Harribitxi (Euskadi)
  • 21:00etan: Milladoiro (Lehiaketatik kanpo gonbidaturiko talde galiziarra)
• Irailak 13, larunbata 
  • 13:00etan: Antía Caaveiro, Antón Lago & Xosé Liz (Lehiaketatik kanpo gonbidaturiko talde galiziarra)
  • 18:30ean: Xara (Madril)
  • 19:45ean: Matazúa (Asturias)
  • 21:00etan: Golconda (Iazko irabazlea, talde gonbidatu kataluniarra)
• Irailak 14, igandea 
  • 12:30ean: Bentazaharreko Mutiko Alaiak taldearekin kalejira
  • 18:30ean: Entós (Asturias)
  • 19:45ean: Gorrondatxe (Euskadi)

Irailaren 14an, igandean, emanaldiak amaitu ondoren, epaimahaia bilduko da eta bere erabakiaren berri emango du. Une horretan, lehiaketako sariak banatuko dira; lehen sailkatu eta talde irabazleari 3.500 euro emango dizkio eta beste 2.000 euro bigarrenari. XX. Folkez Blai lehiaketaren irabazlea gonbidatu gisa etorriko da hurrengo urteko ediziora.

Sarituak izan ez diren talde finalistek 500 euroko dirulaguntza jasoko dute Ermura etorri izanagatiko gastuak ordaintzen laguntzeko.