"Irati", euskal mitologia eta fantasiazko abenturak udako zinean

Aire zabaleko udako zine zikloa azken txanpan sartu da jada, eta azken aurreko saioan, historiako euskarazko film arrakastatsuenaren emanaldia izango dugu. Irati, Paul Urkijo zuzendari gasteiztarraren bigarren film luzea, asteazken honetan, abuztuaren 28an, 22:00etatik aurrera ikusi ahal izango da Orbe Kardinala plazan, euskaraz gaztelaniazko azpitituluekin.

Edurne Azkarate eta Eneko Sagardoy dira protagonistak, Itziar Ituño, Nagore Aranburu, Elena Uriz, Iosu Eguskiza eta Kepa Errastirekin batera, besteak beste. Filmak 5 izendapen lortu ditu Goya sarietarako, eta Donostiako Fantasiazko eta Beldurrezko Zinemaren 33. Asteko Publikoaren Saria irabazi du, txarteldegian aurrekaririk gabeko arrakasta lortzeaz gain.

Irati VIII. mendean girotuta dago. Kristautasuna Europan zehar hedatzen ari da sinesmen paganoak desagertzen diren bitartean. Karlomagnoren armadak Pirinioak zeharkatuz egindako erasoaren aurrean, ibarreko buruzagiak laguntza eskatzen dio antzinako jainkosa bati. Odolezko itun baten bidez, etsaia garaituko du, trukean bizia emanez, baina, aurretik, Eneko semeari aginduko dio bere herria babestu eta gidatzeko aro berrian. Urte batzuk geroago, Enekok promes horri aurre egiteko misio batean murgilduko da: Karlomagnoren altxorraren ondoan modu paganoan lurperatutako aitaren gorpua berreskuratzea. Kristau fedea izan arren, Irati pagano enigmatikoaren laguntza beharko du. Bi gazteak baso arraro batean sartuko dira, non "izena duen guztia existitzen den".

Euria egiten badu, proiekzioa Santiago elizako arkupeetara eramango da.

Gogorarazi nahi dizuegu aire zabaleko azken zine saioa datorren astelehenean, irailaren 2an, egingo dela Super Mario Brosekin, abuztuaren 14ko emanaldia bertan behera uztera behartu zuten arazo teknikoen ondorioz birprogramatuta.