Koloretako txupinazo alaia Haurren Eguna ospatzeko

2024ko Santixauei hasiera emango dien txupinazorako ordu gutxiren faltan, etxeko txikienen txanda iritsi da. Astearte honetan, uztailaren 23an, Haurren Eguna ospatuko dugu, lagunartean gozatzeko, jolasteko eta ondo pasatzeko egun paregabea.

Hirugarren urtez jarraian, Haurren Eguna koloretako hautsen txupinazoarekin hasiko da 11:00etan Orbe Kardinala plazan. Ekimen hau Haurren Kontseiluko umeen proposamenei esker gauzatzen da, eta beraiek igoko dira kioskora herritar guztiak festa dibertigarri honetan parte hartzera animatzera. Txupinazoa baino minutu batzuk lehenago, koloretako hautsak dituzten poltsatxoak banatuko zaizkie haur guztiei, eta igerilekuko betaurrekoekin joatea gomendatzen da begiak babesteko eta erabilitako arropa, zikinduko balitz ere.

Jaia hasi ondoren, 11:15ean buruhandiak aterako dira, eta 11:30ean uretako haur-parkea irekiko da. Bertan jolasteko ezinbestekoa izango da bainujantzia ekartzea. Parkea eta Txarangen Batzordeak antolatutako tailerrak zabalik egongo dira 13:30ak arte goizez, eta 16:00etatik 19:00etara arratsaldez.

16:00etan, buruhandiek plaza hartuko dute berriro, eta 17:30ean, Txarangen Batzordeak txokolatada handi bat eskainiko du indarberritzeko eta ur-parkeaz gozatzen jarraitzeko. 19:00etan, Xilipurdi taldeak haurrentzako berbenarekin alaituko du plaza, eta 20:30ean apar festarekin amaituko da umeentzako egitaraua.

Haurren Egunaren barruan, nerabe ermuarrek ere euren tartea izango dute 22:00etatik 01:00etara Martxoak 8 plazan Javi Hidalgo DJaren Festan Blai ekimenarekin. Ordutegi eta leku berean, gainera, Puntu Morea jarriko da, herritar guztiei zuzendutako gunea eraso matxistak prebenitzeko, artatzeko eta laguntzeko. Informazio-gune horretan gaian adituak diren bi profesional izango dira, eta etengabeko koordinazioan egongo dira jai parekideak bermatzeko lan egingo duten eragileekin.