Korrontzi eta Alboka Musika Eskolako Bandaren kontzertua

"Korrontzi" taldeak eta Alboka Musika Eskolako Bandak kontzertu berezia eskainiko dute aste honetan Ermua Antzokian. Sarrerak 10 €uro balio du eta Kutxabanken webgunean eta Lobiano Kultur Gunean eros dezakegu aldez aurretik. Jarduera honek amaiera emango dio irailera arte Ermuko kultur programazioari eta ‘Korrontzi Hemen gaude 2025’ izeneko biraren barne dago.

Korrontzi taldeak (Mungia, 2004) 20 urte bete berri ditu, eta hori ospatzeko, euskal folkaren sustraiak eta musika banda baten indar sinfonikoa uztartzen dituen ekimena proposatu du. Erronka berria Korrontziren errepertorioa Musika Banda baten esparrura eramatea da.... hau da, trikitiak indarra hartzea Banda bateko musikarien laguntzarekin. Emaitza ikaragarria da!

Iaz, talde euskaldunaren hogeigarren urtebetetzea ospatzeko diskoa kaleratu zuen Bilboko Udal Musika Bandarekin. Lanak taldearen 20 abesti enblematikoenak biltzen ditu, Elkarren estudioetan grabatutako CD bikoitz batean. Erronka musikal eta artistikoa izan da: Korrontziren errepertorioa musika-banda baten formatu eta ezaugarrira egokitzea, trikitixa elementu nagusi aberastua izanik. Xabier Zabala maisuki arduratu da musika moldaketez.