Lau egun musikaz, kirolaz, gastronomiaz eta festaz blai

Gaur asteazkena, uztailak 24, 19:00etan lehertuko da festa Ermuko Orbe Kardinala plazan. Mikel Losada herriko aktoreak botako du 2024ko Santixauei hasiera emango dien txupinazoa, eta gaurtik larunbatera bitartean, berrogeita hamar jarduera baino gehiagok girotuko dituzte gure herriko kaleak musikarekin, kirolarekin eta gastronomiarekin.

Santixau bezpera honetan, txupinazoarekin hasiko da programazioa 19:00etan, eta ondoren txarangen desfilea izango da herriko hainbat kaletan, Irulitxa eta New Tocados txarangen eta Brincadeira batukada taldearen animazioarekin. 22:00etan hasiko da Techno Jaialdia Martxoak 8 plazan, Essan, Alexander Martínez eta Javier Ganuza DJekin, eta 23:00etan Orbe Kardinala plazan Vulkano Show taldearekin dantzaldia izango da. 19:00etatik 03:00etara, Puntu Morea jarriko da Martxoak 8 plazan, herritar guztiei zuzendutako gunea, eraso matxistak prebenitzeko, arreta emateko eta laguntzeko. Informazio-gune horretan gaian adituak diren bi profesional izango dira, eta etengabeko koordinazioan egongo dira jai parekideak bermatzeko lan egingo duten eragileekin.

Uztailaren 25ean, Santixau Egunean, txokolatada handiarekin eta barrus probarekin hasiko da eguna 07:00etan Orbe Kardinala plazan, eta bigantxak 08:00etan Ongarain. Kaltxango eta San Martin plazetan bi haur-parke handi egongo dira (lehenengoa 2-4 urte bitarteko haurrentzat) 12:00etatik 14:00etara 17:00etatik 20:00etara, eta Orbe Kardinala plazan, berriz, herri-kirolen erakustaldia (harri-jasotzaileak, aizkolariak eta iparraldeko jokoak) 12:30etik aurrera. 17:00etan esku-pilotako partida profesionalak hasiko dira Aritzmendi pilotalekuan, eta kalejira alaien ondoren, gaueko ekitaldi nagusiak San Pelaioko NüShu zirku-ikuskizuna (22:30) eta plazako Estrella Central taldearen dantzaldia (23:00) izango dira.

Uztailaren 26an, ostirala, Santa Ana eguna, goizeko jarduerak eta haur-parkeak errepikatuko dira, baina eguneko talde nagusia adinekoak izango dira, 12:00etan Orbe Kardinala plazan egingo den omenaldiarekin eta sari-banaketarekin hasita. Guanajuatoko (Mexiko) Mariachi Imperial taldeak eguerdia girotuko du 13:00etan plazara iritsi eta kontzertua eskaini baino lehen. 14:00etan herri bazkaria izango da Merkatu plazan, eta 18:00etan afizionatuen esku pilota partidak plazako frontoian.

Haurrentzat, Txirri, Mirri eta Txiribiton pailazoen ikuskizuna izango da 19:00etan plazan. Musikari dagokionez, berriz, kalez kale ibiliko dira Alboka Musika Eskolako kideak, herriko txarangak eta Rockalean taldeak, eta gauean, arreta hiru gunetan banatuko da: Martxoak 8 plazan, Massa Confusa, The Sonic Sanctuary, Painapple, Slide eta We Are Apes Hello! taldeekin rock jaialdia izango da (22:00etan); San Pelaio plazan, Haurreskolari kale-ikuskizuna (22:30ean); eta Orbe Kardinala plazan, Pasarela orkestraren berbena (23:00etan).

Azken jai-eguna uztailaren 27a izango da, larunbata, Zezen Eguna. Paella lehiaketa herrikoia izango da Ermuko kaleetan 11:00etatik 12:30era, eta bazkari herrikoian dastatuko dira, 14:00etan. Horrez gain, sardina erreak banatuko dira 11:00etan Martxoak 8 plazan, Kaltxango eta San Martin plazetan haur-parkeak izango dira eta 18:00etatik aurrera, aldiz, kaleak alaituko dituzten erromeria eta kalejirak. Festa amaiera gisa, 23:00etan su artifizialen ikuskizuna izango da Ongarai parketik eta Mondragon Orkestraren kontzertua 23:30ean Orbe Kardinala plazan.

Kontsultatu programazio osoa lerro hauen osteko Dokumentuak atalean.