Lomi Power aparkalekuko plazak esleitzeko zozketa publikoa

Ermuko Udalak Lomi Power aparkaleku berriko garaje-plazak esleitzeko zozketa egingo du maiatzaren 14an, asteartea. Guztira 42 plaza izango dira autoentzat, 15 motorrentzat eta plaza bat mugikortasun murriztua duten pertsonentzat, guztiak abonatu erregimenean, jaso diren 100 eskaera baino gehiagoren artean zozketatzeko.

Zozketa Ermuko udaletxeko Osoko Bilkuren aretoan izango da goizeko 9:30etan, eta publikoa izango da, beraz, interesa duen edonor gerturatu daiteke ekitaldira.

Zozketan saritutako pertsonek aparkaleku bat eskuratuko dute hilean 60 euroren truke autoen kasuan, edo 20 euro hilean motoen kasuan. Prezio horiek urtero eguneratuko dira Osoko Bilkurak gainerako prezio publikoekin eta tasekin batera hartutako erabakiaren bidez.

Plaza bat lortzeko bete beharreko baldintzak garaje-plazaren xede den ibilgailuaren zirkulazio-baimena eta gidabaimena indarrean izatea eta Ermuan erroldatuta egotea dira.

Maiatzaren 14an, asteartea, esleituko diren plazez gain, Lomi Powerreko aparkalekuak txandakako aparkalekuko beste 42 plaza izango ditu, eta beste bi plaza mugikortasun murriztua duten pertsonentzat, beren erabilera-tarifekin.