‘Tanttaka'k bizitzaren zailtasunen inguruko endredozko komedia aurkeztuko Antzokian

‘Tanttaka teatroa'k ‘ Badakizu plastikozko loreak ez direla inoiz bizi izan, ezta?' antzezlana aurkeztuko du ostiral honetan, 20:30ean, Ermua Antzokian. Mireia Gabilondoren obra da, zuzendaritza ere bere gain dagoelarik. Emanaldiak 90 minutu irauten du eta euskaraz eskainiko da. Sarrerak 10 euro balio du eta aldez aurretik eros dezakegu Lobiano Kulturgunean, Kutxabankeko atarian edo kutxazainetan, edo leihatilan emanaldia hasi baino lehen. Antzezleak Aitziber Garmendia, Telmo Irureta eta Mireia Gabilondo dira.

Korapiloz eta gezurrez osatutako komedia da, non bizitzaren zailtasunez eta irteerez hitz egiten den. Bakardadeei buruz hitz egiten du, ezintasun desberdinei buruz, bizitzen jarraitu ahal izateko jartzen ditugun maskarei buruz, gaixotasun mentalei buruz, desamodioari buruz, zahartzaroari buruz, suizidioari buruz, depresioari buruz eta mugitzen ez den baina gelditzen ez den buru batekin bizitzeko ausardiari buruz. Eta terapia psikologikoez, gezurrez, traumez eta landareen zaintzaz, plastikozkoak izan ala ez, Adimen Artifizial batekiko harreman sakonez... eta beste gauza batzuez. Baina komediaren ikuspegitik hitz egiten du. Tarteka oso tragikoa denez komedia, barre egitea besterik ez dago.