Ermuak Erabakitzen Du - 2026ko Aurrekontu parte-hartzaileak

Ermuko Udalak 2026ko Aurrekontuan 250.000 euroko partida bat izango du herritarren eskura, guztion artean Ermua nola hobetu erabaki ahal izateko. Prozesua lau adin-tarte ezberdinetan banatuko da, bakoitza bere diru-partida bereiztuarekin, eta Ermuan erroldatuta dauden 6 urtetik gorako pertsona guztiek parte hartzeko aukera izango dute.

Parte-hartze prozesua fase ezberdinetan banatzen da:

• Martxoaren 1etik 31ra: herritarrek euren proposamenak aurkeztuko dituzte, 2026an burutu daitezkeen eta Udalaren eskumenekoak diren edozein gairen inguruan.
• Apirila: Udalak jasotako proposamen guztiak aztertuko ditu, euren bideragarritasun teknikoa, ekonomikoa eta juridikoa zehazteko.
• Maiatzaren 19tik 30era: bideragarriak diren proposamen guztien artean, herritarrek euren gustokoenak bozkatuko dituzte.
• Ekaina: emaitzak iragarriko dira eta herritarrek hautatutako proiektuak nola gauzatuko diren azalduko da.

Ekimen honen helburua udalerriaren hobekuntzan adin guztietako herritarrak inplikatzea da, demokrazia parte-hartzailea baliatuz.

 

Prozesua lau adin-tarte ezberdinetan banatzen da, bakoitza bere proiektuak burutu ahal izateko diru-partida bereiztuarekin, eta herritar bakoitzak dagokion tartean soilik parte hartu ahal izango du:

• 6-13 urte: 30.000 euro
• 14-29 urte: 50.000 euro
• 30-64 urte: 85.000 euro
• 65+ urte: 85.000 euro

 

 

Adin-tartearen arabera, parte-hartze kanal ezberdinak zabaldu dira. 

 

 

Martxoaren 1etik 31ra proposamenak aurkezteko honako aukerak ditugu:

• 6-17 urte: ikastetxeetan tailerrak egingo dira proposamenak aurkeztu eta guztien artean gustokoenak aukeratzeko.
• 18 urtetik gora:
  • Online galdetegi hau betez
  • Papereko galdetegi hau osatu eta Udal zerbitzuetako hautestontzietan (Abiapuntu, Lobiano Kultur Gunea eta Miguel Ángel Blanco kiroldegia) edo auzoetako kutxatiletan utziz:
    • Bizkaia Etorbidea 5 (Akerlei)
    • Unamuno Gizarte Zentroa
    • Zubiaurre kalea, 24
    • Zerukoa 2 kalea, 9
    • San Pelaio kalea (Eroski)
    • Zearkale kalea, 17
    • Ongarai kalea (San Martin taberna)

Kasu guztietan, pertsona bakoitzak gehienez ere bost proposamen ezberdin aurkezteko aukera izango du lehen fase honetan.



Bozketa fasea

Maiatzaren 19tik 30era, bideragarriak diren eta baldintza ekonomiko eta teknikoak betetzen dituzten proposamenen artean euren gustokoenak aukeratuko dituzte herritarrek. Horretarako, honako bideak izango dira eskura:

• 6-17 urte: ikastetxeetan tailerrak egingo dira proposamenik onenak bozkatzeko
• 18 urtetik gora: identifikazioa derrigorrezkoa izango da bozkatu ahal izateko. Horretarako, bi bide prestatu dira:
  • Aurrez aurre: Abiapuntu bulegoan baliozko agiri batekin identifikatuta, bertan eskainiko den papereko galdetegia beteta
  • Online: Egoitza Elektronikoan ziurtagiri digitalarekin identifikatuta

Adin tarte bakoitzerako aurkeztutako proposamenak laster kontsultatu ahalko dira, eta pertsona bakoitzak dagokion tartean gehienez ere hiru ideia aukeratuko ditu.

 

Oraindik ez dugu emaitzik.