Alboka eguna eta musika emanaldiak astebururako

Alboka Musika eskolak asteburu honetan ospatuko du zentroko eguna, sorreratik urterokoa dugun ‘Alboka Eguna’ren bitartez. Programan jasotzen denez, ekintzei bihar emango zaie hasiera, ikastegiak zabalik izango baititu bere ateak, interesatutako ermuar oro instalazioak bisita ditzan. Eskola osoa, material, azpiegitura, instrumentu eta guzti, ikusgai egongo dira, goizeko 11etatik arratsaldeko ordu 2etara bitartean. Gauean, musika izango da nagusi, ikuskizun eta joaldi zenbait prestatu baitituzte gaueko 10etatik aurrera, Kardinal Orbe plazan. Kontzertua abesbatzek zabalduko dute beren kantuekin. Parte hartuko dute, Alboka txiki (ahots zuriak), Alboka (gazteak) eta ‘Pispillu’k (gizon eta emakume helduak). Jarraian, eskolako banda osatzen duten musikariek joaldia egingo dute eta, gero, eskolako hainbat kidek musika modernoko konposizioak joko dituzte. Aurtengo ikasturte honi amaiera emango dion jaialdi honetan, azkenik, akordeoi joleak arituko dira. Irakaskuntza ez arautuko eskola honetan 268 pertsona matrikulatuta daude, bertan irakasten diren diziplina ezberdinetan. Horien artean eta, batzuek aipatze arren, ondokoak aurki ditzakegu: klarinetea, pianoa, tronpeta, biolina, saxofoia, akordeoia, txirula, tronboia, perkusioa edota biolontxeloa.