2006ko Inauteriak hasi dira

Aurtengo Inauterien egitarauari hasiera emango zaio ofizialki gaur arratsaldean. Herriko ikastetxeek gaur ‘Eguen zuri’ deritzan egun ospetsua ospatuko dute gaur. Herriko eskola ume eta ikasleek jai izango dute arratsaldean eta hiru t’erdietatik aurrera herriko plazan bilduko dira oilarraren jokoan aritzeko. Ikasleek, begiak estali eta musikaren soinuari jarraiki plaza zeharkatu beharko dute saria ezkutatzen duen kaxaren bila. Aurten ere ez da oilar bizirik erabiliko antzina egiten zen moduan, elkarte batek animalia erabiltzearren salaketa jarri zuenetik, ohitura hori bertan behera utzi baita.

Bi ordu beranduago haurrentzako diskoteka hasiko da plazan bertan. Biharkoan, programak aurrera jarraituko du eta ‘Hartza eguna’ ospatuko dugu. Tradizio hori berreskuratu eta mantentzeaz arduratzen den talde euskaltzalea, Euskal Birusa, kalejiran aterako da, arratsaldeko seiak geroztik. Kalejiran ohiko legez, animalia harrapatu ondorengo eta Guillermo Bengoetxea, ‘Txindurri’, zenak idatzitako koplak kantatuko dira kalerik kale.