Gasak eragindako leherketa San Roke auzoko etxebizitzan

San Roke kaleko 9. eraikineko hirugarren pisuan gasak eragindako leherketa izan zen atzo eguerdian. Istripua, lehenengo zantzuak adierazi dutenez, butano gasaren kontzentrazioak eragin zuen. Etxebizitzan une horretan zeuden hiru pertsonetatik bi zaurituta gertatu ziren, etxeko jabea eta bere senitarteko bat. Zauritutakoak Mendaroko ospitalera eraman zituzten, gorputzeko hainbat lekutan erredurak zituztelako. Eztandak kalte materialak eragin zituen etxebizitzako balkoian eta ondoko eta goiko bizilagunen etxebizitzatan. Bestalde, balkoiaren azpiko kalean aparkaturik zeuden bi ibilgailuk ere kalteak jasan zituzten.

Gertakizunaren berri ematen zuen dei bat jaso zuen udaltzaingoak arratsaldeko ordu batak eta laurdenetan. Honek, jakinaren gainean jarriz ituen Ertzaintza eta su-hiltzaileak. Udaltzainek bertara joan trafikoa moztu eta gunea itxi egin zuten. Su-hiltzaileek berriz, kalteak jasandako balkoiko elementu eta kristalak kendu zituzten, oso arriskutsu zeudelako. Udaltzain agenteek zaurituekin egon ziren anbulantziak etorri bitartean eta ibilgailuen jabeei berri eman zieten. Udal-lantaldeko langileek hondakinak jaso eta kalea garbitu zuten, hori zabaldu eta trafikoa normaltasunera buelta zedin. Ertzaintzak gain hartu du gertatutakoaren ikerketa.