-Los Panchos- hirukotearen azken ahotsa

Rafael Basurto Lara kantaria bihar Ermuan izango da. Mexikarrak kantaldia emango du Zineman, gaueko hamarrak eta laurdenetan. Ekitaldi hori udal kultura sailak antolatu du eta urriko agendan txertatzen da. Sarrerak 18 € balio du ikusle orokorrentzat eta hiru gutxiago Zinemaren bazkideak direnentzat. Aldez aurreko salmentan hasita dago eta sarrerak kultura bulegoan eskuratu daitezke.

Betiko ‘Los Panchos’ taldea oso gogoan du oraindik ere Rafael Basurtok, taldearen azkenengo liderraren ahotsak. Hirukote mitikoak garai bat markatu zuen bere estilo erromantiko ahaztezinarekin, eta oraindik orain hispanoamerikako hainbat belaunaldietako kideen oroimenean sustrai sakonez erroturik dago.

Rafael Basurtok biharko kantaldian hirukote ospetsuaren abesti klasikoak eta bere azken diskoko berriak kantatuko ditu. Bere esanetan, sentimenduak ez direla aldatzen gogorarazi nahi dio jendeari. Musikan egin duen ibilbidean arrakastarik gorena lortu duten boleroak ditu. Kantariaren azken diskoak ‘Enamorado’ titulua darama eta bertara betiko abesti unibertsalak bildu eta egokitu ditu, esaterako Juan Carlos Calderón konpositorearen, ¿De qué manera te olvido? edo ‘Tómame o déjame’.