Máximo Aláez pintore asturiarrak erakusketa zabaldu du gaur

Máximo Aláez pintore asturiarrak erakusketa zabaldu du gaur Ermuan. Gure Autonomi Erkidegora estrainekoz etorri da artista hau eta udal kultura sailaren eskutik egin du. Erakusketak aste bete iraungo du eta epe hori motz gera daiteke, ikusmina sortu baita autore honen lanak ikusteko. Aláezek gaur goizean bertan zintzilikatu ditu bere koadroak Lobiano Kulturguneko bi aretoetan. Erakusketa urriaren 22ra bitartean egongo da zabalik. Bere ordutegia lanegunetan arratsaldeko 6etik 8etara bitartean da eta larunbat eta jai egunetan, goizez 10etatik ordu 2etara eta arratsaldez 6etatik 8etara. Sarrera doan da.

Maximo Aláez Aviles herrian jaio zen 1970. urtean. Arte Ederrak ikasteari ekin zion Sevillan eta 2001. urtean lizentziatu zen.Ordutik hona erakusketa indibidual zein kolektiboetan hartu du parte, aipagarriena Bochum-en(Alemanian) Amnesty International Kunts Auktion'' izenekoan izanik, hain zuzen ere.Aláezek hogeita hamar bat koadro ekarri ditu gurera. Horietatik lau tamaina handikoak dira eta horiek Lobianoko lehenengo aretoan jarri ditu. Gainerako guztiak, tamainaz txikiagoak eta serie ezberdinetakoak direnak, bigarren aretoan daude zintzilik. Pintura horien artean autoreak bere buruari eginiko erretratua dago.