Betiondoko futbol-zelaian harmaila estalia egiteko lanak Aste Santuaren ondoren hasiko dira

Betiondon eskolako futbol-zelaian harmaila estalia egiteko lanak Aste Santuaren ondoren hasiko dira. Harmailaren obra Antzibar enpresak egingo du eta horretarako, kontratuan aurreikusitakoaren arabera, lau hilabete erabiliko ditu. Proiektua Álvaro Pérez de Amezaga Esteban arkitekto donostiarrarena da eta hori gauzatzeak 400000 euroko kostua izango du. Kopuru horren barne, obraren zuzendaritza eta jarraipena sartzen da. Harmaila berriak Betiondo kirol gunea osatuko du, horri funtzionaltasuna erantsiz eta erabiltzaileei erosotasuna eta zerbitzua emanez.

Harmailaren ezaugarri teknikoak

Harmaila altueran egongo da, lurretik bi metro eta erdira alegia. Harmaila horrek hegaldia izango du eta estalirik egongo da, goitik, atzeko aldetik eta albo batetik. Estaltzeko erabiliko den materiala argia pasatzen uzten duen polikarbonatoa zango da. Harmailak 150 jarleku izango ditu, beste horrenbeste ikuslerentzat. Bertara igotzeko bi eskailera izango dira. Bana albo bakoitzean. Horren azpian biltegi bat egingo da, atletismoko eta futboleko materiala gordetzeko. Komunak ere azpian egingo dira, horiek minusbaliatuentzat ere egokiturik egongo direlarik. Egiturak argiak izango ditu eta eskaileretan ere argidun balizak jarriko dira, segurtasun neurrietan xedatutakoa betetzeko.

Harmailaren sarrera bertan dagoen bidegorritik egingo da. Harmailak banandu egingo ditu kirolari eta ikusleek. Azken horiek, hemendik aurrera perspektiba ezin hobea izango dute harmailak izango duen altuerari esker.