BeBeerStationek bigarren urtez pintxo lehiaketako txapela jarraian jantzi du

‘BeerStation’ garagardotegiak Ermuko seigarren pintxo lehiaketako txapel ofiziala eskuratu du. Txapelketa eskuratzen duen bigarren aldia da, iaz ere irabazle suertatu baitzen. Establezimenduaren ‘Gaztamendi’ izeneko konposizioa saridun suertatu da. Pintxoak ondoko osagaiak zituen: gazta, ahate-urdaiazpikoa eta letxuga hainbat nahasturik. Bigarren postua ‘Cheers’ establezimenduak, lortu du ‘Uxue’ izeneko proposamenarekin: usakume eta karamelutako kipularekin. Lehiaketa bart gauean erabaki zen, epaimahaiko kideek establezimendu guztiak bisitatu ondoren.

Epaimahaiak pintxo guztiak dastatu zituen eta bakoitzaren presentazioa, egiteko prozedura, egitura eta zaporea baloratu. Epaimahaia Ondarroan dagoen Kantabria tabernako Patxo Bedialaunetak, San Miguel gainean dagoen ‘Belaustegi’ jatetxeko Iosu Mugertza sukaldaritza buruak eta Lobianoko kidea den Jesus Portugalek osatu zuten. Orain herritarren iritzia besterik ez zaigu falta, bozka lehiaketaren eta herritarren iritziaren arabera aurtengo edizioko txapelduna ezagutzeko. Bakoitzaren ustez pintxo onenaren alde bozkatu nahi dutenek, oraindik garaiz daude. Web-gune honen bidez egin dezakete gaurko gaueko hamabiak bitartean edo, bestela, bihar goizean, azokan ezarrita egongo den hautestontzian.

‘Lobiano Elkarte gastronomikoko kideek pozarren agertu dira pintxo lehiaketan ermuar ugarik parte hartu duelako. Horren erakusle, aurtengoan hogei establezimenduk izena eman eta pintxoak aurkeztu izana da. Halaber, adierazi behar atzoko arratsaldean taberna batek hirurehun pintxo zerbitzatu zutela eta beste hainbat berrehuneko kopurua pasa zituztela. Antolatzaileen batzordeko kide den Jesus Portugalek adierazi duenez jendearen parte hartzeak, ‘giro jatorra’ hedatzen lagundu dute. Partaidetza oso handia izan denaren erakusle da ondoko datua; establezimendu bat baino gehiago pintxorik gabe geratu izana. Epaimahaiak adierazi duenez, irabazlea erabakitzea ez da batere lan erraza izan, ‘lehiaketara aurkeztu diren pintxo guztiak kalitatezkoak izan baitira’.