Zezen-ikuskizun hainbat izango, 2008ko Santixauetan

Tauromakiak bere leku eta tartea izango du aurtengo Santixauetan. Herriko ‘Rui Bento Vasques’ torero portugaldarraren izena daraman elkarteak Santixauetako kartela eta programa aurkeztu ditu gaur eguerdian. Aurkezpen hori ordu batetan Lobiano Kultur Gunean eginiko agerraldiaren bidez egin da. Agerraldi horretan aurkezle lanak Antonio Picamiel Ruizek egin ditu. Berarekin batera aurkezpen mahaian egon dira, elkarteko buru den Luis Maria Lopez, Gorabideko Miguel Ocariz eta udalbatzako zinegotzi Victor Ferrero. Agerraldi horretan Rui Bento Vasquez elkarteak iragarri duenez, aurtengo nobilladan biltzen den diru guztia, minusbaliatu psikikoekin lanean diharduen Ermuko Gorabide Elkarteari emango zaio, laguntza gisa. Hori horrela, aurkezpenean izan diren guztiek, ikuskizunera joateko deia egin diote herriari, diru-bilketa lan oso duina egiten duen taldearentzat izango delako.

Bigantxak, nobillada eta jaialdi herrikoia

Ikuskizun horiek guztiak, Betiondon jarriko den zezen-plaza egingo dira. Zezen-plazak hainbat ekitaldi hartuko ditu bere barne. Horietako esanguratsu eta jendetsuenak uztailaren 25etik 27ra bitarteko hiru goizetan jarraian izango diren bigantxak. Horiez gain eta herriko ‘Rui Bento Vasques’ torero portugaldarraren izena daraman elkarteak beste bi ikuskizun ere antolatu ditu. Aurtengo bi ikuskizunak zertxobait ezberdinak izango dira. Lehena Santiago eguneko arratsaldean egingo den nobillada da, eta bertan hiru torerok eta nobillero batek hartuko dute parte. Kartelean iragarrita dagoenez parte hartuko dute Kolonbiako Guerrita chicok; Sevillako Manuel Carbonellek; Madrilgo Jesús Albak eta Miguel González nobillero gazteak. Ganadua Salamancatik ekarriko da, Lorenzo Rodriguez enpresariaren ganadutegitik.

Bigarren ikuskizuna, jaietako azken egunerako iragarrita dago. Kasu honetan, jaialdi herrikoia izango da. Bertan piramidea keta errekortadoreak ikusi ahal izango dira, zezen-plaza berean. Ekitaldi bi horiek, arratsaldeko sei eta erdietan hasiko dira. Ikuskizunetarako sarrerak aldez aurreko salmentan eskaintzen dira gaurtik bertatik. Sarrerak Outomuro eta Kiska kafetegian daude salgai. Xehetasun gehiagorako ikus Santixauetako argitaratu den berariazko kartela. Horretarako sakatu beherago dagoen informazio gehiagoren lasterbidearen gainean.