Gaur gauen gustora, ‘A gusssto! antzezlanarekin Lobianon

Gurutze Beitia eta Gorka Aginagalde umorista eta aktore bikoteak ‘‘A gusssto!’ tituluko lana dakarte gaur Lobianora. Ikuskizuna ikusteko bia saio izango dira, lehen arratsaldeko zortzietan eta bigarrena gaueko hamarrak eta laurdenetan hasiko da eta sarrerak 5 euro balio du. Lana ikusteko aukera bakarra izan behar zen hasiera batean, baina ikusleek oso harrera ona egin diotenez eta sarrera guztiak saldu direnez, udal kultura sailak bigarren emanaldi bat adostu promotorearekin. Lana Gorka Aginagalde berak idatzi du, emanaldian aktore gisa ere parte hartuz. Antzerkiak hirurogei minutu irauten ditu. Ikuskizuna udal kultura sailak antolatu du eta urteko azken hiruhilekoko programazioaren barne txertatzen da.

Gorkak eta Gurutzek ezagutarazi dituzten pertsonaien azalean sartzen dira: Patxi Agirregorrietxeberrigoitiabeitia eta Estela Maria Lourdes de Aquitepillo-aquitemato. Patxi Varadero eta turismo sexual zale amorratua den euskalduna da. Estela berriz, Patxiren bihotza bereganatu duen neska kubatar oparoa. Bikoteak umore euskaldun eta kubatarra uztartzen duen proposamena dakartzate. Hemengo eta hango umorea, ‘aurreskua’ eta ‘reguetona’ nahasturik…, bitxia, xelebrea, gozoa eta, batez ere, dibertigarria. Hirurogei minutu gustura pasatzeko.