Txupinazoak hasiera ofiziala emango die bihar herriko jai nagusiei

Bihar arratsaldean botako den txapliguak herriko jai nagusiei hasiera emango die ofizialki. Txapliguak hiru eguneko eta atseden eta neurririk gabeko jaiari hasiera emango dio. Txapligua arratsaldeko zazpietan botako da Orbe Kardinalaren plazatik. Zertxobait lehenago herriko alkate Carlos Totorikak bertaratutako guztiak agurtu eta jai zoriontsuak pasatzeko esango die. Txapligu ofiziala botatakoan txaranga kideek joko dituzten bonboen eta turuten soinuei leku egingo zaie. Bihar arratsaldean botako den txapligu hori, jai egunetako bakarra izango da udalak ekidin nahi baitu jaiak eragotzi dezaketen bestelako elementurik. Horregatik, aurten txapligu bakarra botatzea eta egiteko hori "Insomni Teatre" piroteknia enpresen esku uztea erabaki du udalak. Enpresa horrek langile aditu bat ekarriko du zeregin horretarako, datorren igandean ere, herrian izango baita su artifizialak jaurtitzeko.

Kalejira bitan banatuko da: aurrean busti nahi ez dutenek eta Pololaren atzeak inporta ez zaienak

Txupinazoaren ondoren txarangak aurkezteko ekitaldi eta kalejirari hasiera emango zaio herriko kaleetatik zehar. Kalejira hori ‘Irulitxa’ fanfarriak eta beren musikak girotuko dute. Iazkoan bezala, Txarangen batzordeak ohar bat zabaldu du txaranga kideen eta herritarren laguntza eskatuz inork kalejirari uko egin ez diezaion, batez ere busti nahi ez duten guztiek, azken urteetan balkoietatik ura botatzea ohitura bihurtu baita. Hori ekiditeko, kalejira bitan zatituko baita. Busti nahi ez dutenek lehenengo aterako dira desfilean fanfarriaren atzetik. Segidan, bustitzea inporta ez zaien guztiak joango dira, Polola kopinaren atzetik.

Kalejiraren ibilbidea ondorengo hau izango da: Orbe Kardinalaren plaza, Valdespina Markesa, Goienkale, Zubiaurre, Sexto Centenario, merkatu plazatik eta San Pelaio kaletik, Mallabirako bidean dugun errotondara bitartean, Zeharkalea, Valdespina Markesa eta berri ere plazara.

Gaueko 21:00etan hainbat kontzertu hasiko dira Valdespina Markesaren parkean. Parte hartuko duten taldeak honakoak dira:

• 21:00 h: DJ. Alexander M. (musika elektronikoa)
• 23:00 h: Nemon (musika folk)
• 00:00 h: Seiurte (musika rock)
• 2:00 h: DJ Alexander M., Txanprax Perkusion eta DJ Fey (musika elektronikoa)

Gaueko hamaiketan, herriko plazan, lehenengo dantzaldiari emango zaio hasiera. Dantzaldian ‘Esmeralda’ orkestrak joko du.