BAOn argitaratu da fatxadak berritzeko laguntzak ezartzen dituen Ordenantza

Udalbatzarrak orain gutxi udalerrian fatxadak birgaitu eta berritzeko diru-laguntzak ematea arautzen duen duen ordenantza hasierako izaeraz onartu zuen. Aipatu erabakia jendaurrera jarri da hilabetez, herritarrak ezagutu eta iradokizun, alegazio eta erreklamazioak aurkezterik izateko. Hilabetea igaro eta inork eragozpenik adierazi ez duenez, Ordenantza behin-betikotzat jo eta oso-osorik argitaratu da Bizkaiko Aldizkari Ofizialaren 121.zenbakian, 2012ko ekainaren 25eko alean.

Araudiak hitzaurrean ondokoa dio: “Udalak bizitegirako eraikinen jabeei apaintasun publikoko baldintzak mantentzeko dagokien betekizuna betetzen lagundu nahi die, ingurune harmoniatsu, atsegin eta estetikoki egokia suspertuz. Honakoa araudiaren bitartez Ermuko udalerriko bizitegi-lurzoruan dauden etxebizitza-eraikinen fatxaden kontserbazio-, mantentze- eta apaintasun-egoeraren hobekuntza suspertu nahi da”.

Ordenantzan arautzen diren laguntzen helburua herriko hiri-luzoruan kokatutako bizitegi-erabilerako eraikin kolektiboen fatxadak osorik birgaitu eta berriztatzeko diru-laguntzak ematea da. Ordenantza honetan arautzen diren diru-laguntzak eskuratzeko 25 urte baino eraikin zaharragoetan egin beharko dira birgaitze eta berriztatze-obrak. Ez da diru-laguntzarik emango udalak helburu berarekin emaniko diru-laguntza jaso zenetik gutxienez hamabost urte iragan ez badira, ohiz kanpoko arrazoi justifikaturik frogatzen ez bada.

• Ordenantzaren testu osoa