‘Bularretik mintzora’ irakurketa klubak denboraldi berriari hasiera emango

Euskara Sailak eta Udal Liburutegiak antolatutako “Bularretik Mintzora” irakurketa kluben jarduerak denboraldi berriari hasiera emango dio urrian. Lehenengo saioa urriaren 19ko larunbatean izango da. Hiru eta zortzi urte bitarteko ume eta euren gurasoei zuzendutako irakurketa klub hauek orain dela 4 urte hasi ziren Ermuan antolatzen, harrera oso onarekin.

Ekimena bi adin tarteetan banatuta dago, lehena 3 eta 5 urte bitarteko umeentzako Irakurketa Kluba et, bigarrena 6 urtetik 8 bitarteko partaideentzat. Jarduera hilean behin eta larunbatean egiten da Lobianon. Goizeko 10:00etan 3 eta 5 urte bitarteko Irakurketa Kluba batzen da, eta 12:15ean 6 eta 8 urtekoa, eta euskaraz egiten da. Beraz, parte hartzen duten umeek eta ekimenean eurekin doazen helduek (amak, aitak, amamak, etab.) euskara hiztun izan behar dute. Doakoa bada ere, aldez aurretik eta urriaren 11a baino lehen izena eman behar da Liburutegian, plaza mugatuak direlako.

Saioen dinamizatzailea Galtzagorri Elkarteko Lur Korta izango da. Saio bakoitzean “liburu izarrak” aurkeztuko dira eta horiei buruzko proposamenak egingo dira, talde txikietan. Gainera, haurrek eta euren gurasoek beren “liburu gogokoenak” aurkeztu ahal izango dituzte.